विश्वविद्यालय र विद्यालयबाट २ महिनाभित्र दलीय विद्यार्थी संगठन हटाउने सरकारको निर्णय
६ वैशाख २०८३, आइतवार
एसीसी यू–१९ एसिया कपको पहिलो खेलमै नेपाल श्रीलंकासँग आठ विकेटले पराजित
संयुक्त अरब इमिरेट्स (यूएई) मा जारी एसियाली क्रिकेट काउन्सिल ९एसीसी० पुरुष यू–१९ एसिया कपमा नेपाली टोलीले निराशाजनक सुरुआत गरेको छ । दुबईस्थित द सेभेन्स स्टेडियममा शनिबार सम्पन्न आफ्नो पहिलो खेलमा नेपाल बलियो प्रतिद्वन्द्वी श्रीलंकासँग आठ विकेटले पराजित भएको हो ।
टस हारी पहिले ब्याटिङको निम्तो पाएको नेपालले ५० ओभर खेल्न नसक्दै २८।५ ओभरमा अलआउट हुँदै जम्मा ८२ रन मात्र जोड्न सक्यो । नेपाली ब्याटिङ लाइन अप श्रीलंकाली बलरको धारिलो आक्रमणसामु कमजोर सावित भयो ।
जवाफी ब्याटिङमा श्रीलंकाले लक्ष्य सहजै पूरा गर्यो । श्रीलंकाली टोलीले १४।५ ओभरमै दुई विकेटको क्षतिमा ८४ रन बनाउँदै खेल आफ्नो पक्षमा पार्यो । ओपनर दिमान्था महाभिथानाले अविजित ३९ रनको योगदान गरे भने कविजा गामागेले अविजित २४ रन बनाए । नेपालका लागि दयानन्द मण्डलले एक विकेट लिन सके ।
यसअघि नेपाली इनिङ्समा कुनै पनि ब्याट्सम्यानले लामो समय क्रिजमा टिक्न सकेनन् । ओपनर साहिल पटेल १२ रनमा आउट हुँदा अर्का ओपनर निरज कुमार यादव १० रनमै पेभेलियन फर्किए । ५० रन नपुग्दै नेपालले चार महत्वपूर्ण विकेट गुमाएको थियो ।
तेस्रो नम्बरमा आएका वंश क्षेत्री खाता नखोली आउट भए । सिबरिन श्रेष्ठले ४३ बल खेल्दै एक चौकाको मद्दतमा १८ रन जोडे । दिलसाद अली शून्य रनमा आउट भए भने कप्तान अशोक धामी नौ रनमै सीमित रहे । अभिषेक तिवारीले अविजित सात रन जोडे । रोशन विश्वकर्मा एक, युवराज खत्री पाँच र विपिन शर्मा एक रनमै आउट भए । नेपालले अतिरिक्त रूपमा १९ रन पायो । श्रीलंकाका सेथमिका सेनेविरत्नेले उत्कृष्ट बलिङ गर्दै पाँच विकेट लिए ।
यू–१९ एसिया कपको यो १२ औं संस्करण हो, जुन डिसेम्बर २१ तारिखसम्म सञ्चालन हुनेछ । प्रतियोगितामा नेपालसहित आठ टोली सहभागी छन्, जसलाई दुई समूहमा विभाजन गरिएको छ । समूह ‘बी’ मा नेपाल, अफगानिस्तान, बंगलादेश र श्रीलंका रहेका छन् ।
नेपालले आफ्नो दोस्रो खेल डिसेम्बर १५ मा बंगलादेशसँग तथा तेस्रो खेल डिसेम्बर १७ मा अफगानिस्तानसँग खेल्नेछ । समूह चरणपछि प्रत्येक समूहबाट शीर्ष दुई टोली सेमिफाइनलमा प्रवेश गर्नेछन् । सेमिफाइनल खेल डिसेम्बर १९ र फाइनल खेल डिसेम्बर २१ मा आईसीसी एकेडेमी ग्राउन्डमा हुनेछ ।
बंगलादेश प्रतियोगिताको साविक विजेता हो । भारतले हालसम्म आठपटक, बंगलादेशले दुईपटक तथा पाकिस्तान र अफगानिस्तानले एक–एक पटक उपाधि जितेका छन् । नेपालले यसअघि नौपटक यू–१९ एसिया कप खेलिसकेको छ र सन् २०१७ मा सेमिफाइनलसम्मको यात्रा तय गरेको थियो ।
Follow us on Facebook
Follow us on Twitter
Follow us on Instagram